Newyddion

Mae Catalydd 360º / Catalyst 360º, rhaglen breswyliadau Realiti Ymestynnol (XR) gyntaf Cymru, yn dychwelyd eleni gyda’r rhaglen fwyaf eto o breswyliadau, sioeau arddangos Realiti Ymestynnol a Diwrnod Agored.

Mae Labordy CULTVR yn falch o gyhoeddi rhifyn 2026 o Catalydd 360º, rhaglen breswyliadau Realiti Ymestynnol gyntaf Cymru. Ers agor ei drysau saith mlynedd yn ôl, mae canolfan CULTVR wedi chwarae rhan flaenllaw wrth hybu a chefnogi artistiaid digidol a throchol lleol a rhyngwladol i ddatblygu a chyflwyno gwaith newydd. Gan adeiladu ar y seiliau hyn, bydd rhifyn 2026 o Catalydd 360º yn cyflwyno ein rhaglen fwyaf eto o weithgareddau a digwyddiadau. Wedi galwad agored a ddenodd dros 300 o geisiadau gan artistiaid, mentrau cydweithredol a sefydliadau o 55 o wledydd, bydd Catalydd 360º yn cyflwyno:

• 3 o breswyliadau celfyddydau trochol
• 6 o sioeau arddangos Realiti Ymestynnol, a
• Rhaglen o ddigwyddiadau sy’n agored i bawb ac sy’n chwalu rhwystrau i ymgysylltu â chelfyddydau digidol a throchol

Eleni, mae rhaglen Catalydd 360º yn derbyn cefnogaeth am y trydydd tro gan Gyngor Celfyddydau Cymru. Rydyn ni’n ymroi o hyd i hybu crefft creu storïau trochol ac arbrofi technegol a rhoi cyfle i artistiaid ymchwilio, datblygu a chyflwyno gwaith newydd gan ddefnyddio adnoddau arbenigol blaengar CULTVR. Bydd y preswyliadau’n cynnig lle gweithio, cefnogaeth ac adnoddau technegol i artistiaid sy’n gwthio ffiniau ffurfiau celf trochol.

Ochr yn ochr â’r preswyliadau, bydd detholiad o artistiaid a sefydliadau o Gymru’n cyflwyno gweithiau Realiti Ymestynnol newydd am y tro cyntaf yng nghryndo CULTVR. Bydd y cyflwyniadau byw hyn yn agor y drws ar fydoedd creadigol beiddgar a chyffrous a sbarduno deialog rhwng artistiaid, cymunedau lleol a’r cyhoedd yn gyffredinol.

Yn Grangetown yng Nghaerdydd mae gwreiddiau a chartref Labordy CULTVR. Rydyn ni wedi ymroi i greu gweithiau celf trochol i bawb. Mae rhaglen 2026 hefyd yn cynnwys gweithdai, sgyrsiau gan artistiaid, ymarferion agored a theithiau tywys i groesawu cynulleidfaoedd newydd i mewn i fyd Realiti Ymestynnol a pherfformiadau trochol.

Bydd Labordy CULVR yn cynnal Diwrnod Agored i’r Gymuned ar 10 Awst 2026. Bydd yn gyfle i unrhyw un sy’n chwilfrydig i alw heibio i weld beth sydd gan y ganolfan gelfyddydau hynod yma i’w gynnig. Bydd hefyd yn gyfle i brofi gweithiau celf trochol a chwrdd â’r artistiaid sy’n gyfrifol am greu gweithiau a pherfformiadau trochol y rhaglen.

“Rydyn ni’n eithriadol o falch o lansio rhifyn 2026 o Catalydd 360º a pharhau i greu cyfleoedd i artistiaid sy’n gweithio gyda ffurfiau celf trochol,” meddai Matt Wright, Cyfarwyddwr Artistic Labordy CULTVR. “Mae rhaglen eleni’n adlewyrchu ystod ac amrywiaeth y creadigrwydd sydd ar waith yma yng Nghymru ac yn rhyngwladol, a hefyd ein hymrwymiad cadarn i fynediad ac ymgysylltu, arbrofi, a chysylltu â’r gymuned.”

Prosiectau a ddewiswyd ar gyfer Catalydd 360º 2026:

• 31 Gorffennaf: Spectral Lures gan Carlos Serrano / Profiad adleisiol a thrawsnewidiol sy’n cymylu’r ffin rhwng y naturiol a’r artiffisial, gan gwestiynnu nid yn unig beth rydyn ni’n ei weld, ond natur ein canfyddiad.
• 7 Awst:  Sunrise in Other Worlds gan Squidsoup / Gosodwaith a pherfformiad trochol haniaethol sy’n dychmygu cylchdroadau’r wawr a’r machlud mewn bydoedd arallfydol gan gario’r gynulleidfa ar draws tirweddau pellenig.
• 21 Awst: Hope Immersive gan The Blackout / Dathlu penblwydd y band yn 15 oed gyda pherfformiad byw egnïol yn adlewyrchu cyfoeth eu gwaddol cerddorol a’u hagwedd flaengar wrth greu cerddoriaeth a symud tua’r dyfodol.
• 11 Medi: Land Empathy gan Richard Chappell Dance / Perfformiad o waith dawns gyfoes wedi’i ysbrydoli gan argyfwng yr hinsawdd – yn archwilio sut y gall symudiad ddyfnhau cysylltiadau emosiynol ac ysbrydol â byd natur.
• 18 Medi: Mindset gan Natalie Roe a Beth Lewis / Profiad trochol sy’n cyfuno gosod a llywio sain ar y pryd, cerddorion ar grwydr, elfennau gweledol 360º, a thrin a chyfeirio elfennau gweledol ar y pryd.
• 25 Medi: Dying and Rising gan Celyn of Gwent / Perfformiad clyweledol byw yn plethu lleisiau ac elfennau gweledol sain-ymatebol a monologau barddonol.
• 1 Hydref: Give Us Dance gan Krystal S. Lowe, IKAMBA a Onismo Muhlanga / Digwyddiad trochol sy’n cyfuno sain, symudiad a delweddaeth i ysbrydoli llesiant, meithrin cysylltiad a thoddi ffiniau perfformio traddodiadol.
• 13 Tachwedd: Uncanny Valley gan Georgia Ruth / Taith weledol a cherddorol drwy stafelloedd sain ei halbwm nesaf – lle mae pethau cyfarwydd yn dechrau teimlo’n rhyfedd, a lle mae anesmwythyd yn bwrw cysgod dros gysur.
• 14 Tachwedd: Sioe arddangos arbennig gan Teddy Hunter / Perfformiad wedi’i ail-greu o’r newydd ar gyfer y cryndo, gan blethu electroneg amgylchynnol, lleisiau byw, elfennau gweledol 360º ac offeryniaeth gan fand llawn.

I fanteisio’n llawn ar raglen 2026, gallwch brynnu Pas Catalydd 360º sy’n rhoi mynediad i chi i bob un o’r naw sioe arddangos sy’n cael eu cyflwyno yn ystod ein tymor o berfformiadau a digwyddiadau. Mae hwn yn gyfle delfrydol i unrhyw un sydd am brofi holl rychwant y rhaglen. Ac mae’n fargen go iawn – nid yn unig yn rhoi mynediad i bob sioe, ond hefyd yn rhoi cyfle i chi brofi amrywiaeth eang o berfformiadau trochol, gosodweithiau a digwyddiadau Realiti Ymestynnol byw drwy gydol tymor Catalydd 360º.

Mae ffilm gryndo amgylchynnol (fulldome) ddiweddaraf 4Pi Productions o Gymru, The Rift, wedi ennill y brif wobr yng nghategori Cystadleuaeth y Cryndo yng Ngŵyl NewImages ym Mharis – gŵyl ryngwladol nodedig ar gyfer straeon trochol a Realiti Ymestynnol. Mae’r wobr yn garreg filltir bwysig ar daith ryngwladol y ffilm yn dilyn ei dangosiad cyntaf yng Ngŵyl Ffilm Ddogfen Ryngwladol Amsterdam (IDFA) ym mis Tachwedd 2025.

Mae The Rift yn gyfuniad o ddawns gyfoes ac elfennau gweledol a sain trochol, gyda dŵr fel llinyn storiol sy’n uno’r cyfan. I gyfeiliant ‘Mvura’ – cân gan Mary Anibal wedi’i ail-gymysgu gan NO SHAPE – mae’r ffilm yn cyflwyno pedwar dawnsiwr yn perfformio coreograffi cyffredin mewn lleoliadau amrywiol yn Zimbabwe, gan ymgorffori’r tensiwn, gwytnwch a rhyng-gysylltiad rhwng dynoliaeth a byd natur dan bwysau newid yn yr hinsawdd.

Dyma’r bumed ffilm ers 2012 i gael ei chyflwyno yn y Cryndo Dawns, gofod arbennig ar gyfer perfformiadau trochol a ddatblygwyd gan 4Pi Productions, gyda chefnogaeth Coreo Cymru a Chyngor Celfyddydau Cymru. Mae’r prosiect wedi teithio’n rhyngwladol ac wedi cael ei gyflwyno mewn amryw o lefydd gwahanol gan gynnwys Macau, Hammerfest (Norwy), Caeredin, Rhydychen a ledled Cymru. Roedd cynrychioli’r DU fel rhan o ddathliadau penblwydd Canolfan Ddiwylliannol Hong Kong yn 30 oed yn 2019 (gyda Cherddorfa Symffoni Llundain ac Akram Khan) yn garreg filltir arwyddocaol yn hanes y Cryndo Dawns. Mae’r ffilmiau a gynhyrchwyd ar ei gyfer wedi cael eu dangos yn rhai o ganolfannau celfyddydau trochol blaenllaw’r byd, gan gynnwys Planetariwm Morrison yn Academy Gwyddoniaethau California yn San Francisco, Planetariwm Melbourne yn Amgueddfa Victoria, Planetariwm Charles C. Gates yn Denver, a gwyliau o Buenos Aires i Mauritius.

Mae The Rifft yn ffrwyth llafur prosiect cydweithio rhwng y DU a Zimbabwe – drwy XR Labs. Daeth y prosiect â stiwdio gelfyddydau trochol 4Pi Productions (Cymru), Matamba Film Labs ac Ymddiriedolaeth Gelfyddydau AfriKera yn Harare (Zimbabwe) at ei gilydd i greu’r ffilm. Roedd y prosiect, a dderbyniodd gefnogaeth gan raglen Cydweithio Rhyngwladol y British Council, yn gyfuniad o greadigrwydd artistig a rhaglenni datblygu sgiliau. Bu’n gyfrwng i ddarparu cyfleoedd hyfforddi (wedi’u cydlynnu gan Matamba Film Labs) i gohort o weithwyr creadigol benywaidd – ‘Future Femmes’. 4Pi Productions oedd yn gyfrifol am ddarparu’r hyfforddiant, gan rannu profiadau a gwybodaeth am dechnoleg Realiti Ymestynnol a phroses greu ffilmiau 360° i arfogi’r cyfranogwyr ag adnoddau a sgiliau newydd i adrodd eu straeon eu hunain wrth ddefnyddio cyfryngau trochol.

Dangoswyd y ffilm am y tro cyntaf yn Arddangosfa DocLab yn IDFA 2025, lle cafodd dderbyniad gwresog iawn gan gynulleidfaoedd a thanio diddordeb y diwydiant. Ers hynny, mae The Rifft wedi parhau i fagu momentwm ar gylchdaith y gwyliau rhyngwladol. Cafodd Ganmoliaeth gan y Beirniaid yng Ngŵyl Dome Under yn Melbourne, Awstralia ym mis Chwefror 2026.

“Mae derbyn y gydnabyddiaeth yma’n anrhydedd anhygoel i’r tîm cyfan y tu ôl i’r prosiect” dywedodd Janire Najera, Cyfarwyddwr Creadigol 4Pi Productions. “Cafodd y ffilm ei chreu drwy gydweithio gwirioneddol rhwng artistiaid yng Nghymru a Zimbabwe, ac mae gweld ymateb gwresog cynulleidfaoedd wedi bod yn brofiad eithriadol o werth chweil.”

Cafodd y ffilm ei dangos yng Ngŵyl NewImages yr wythnos ddiwethaf – yn y Planetariwm yn Cité des sciences et de l’industrie ym Mharis. Mae Gŵyl NewImages yn fan cyfarfod i artistiaid, cynhyrchwyr, gweithwyr technoleg a sefydliadau diwylliannol o bob rhan o’r byd. Mae’n gyfle arbennig i gyflwyno profiadau realiti rhithwir, realiti estynedig a chryndo amgylchynol blaengar yn ogystal â bod yn fforwm i weithwyr ym maes y celfyddydau trochol a chyfle i rwydweithio. Mae’n blatfform allweddol ar gyfer cyflwyno gwaith trochol sy’n gwthio ffiniau a meithrin cyfleoedd ar gyfer prosiectau cydweithio rhwng aelodau’r gymuned Realiti Ymestynnol ryngwladol. Eleni oedd y tro cyntaf i NewImages gynnwys fformat y cryndo amgylchynol (fulldome) yn y gystadleuaeth, ac felly dyma’r wobr gyntaf erioed i’r ŵyl ei dyfarnu am waith cryndo amgylchynol.

Mae ennill un o’r prif wobrau yng Ngŵyl NewImages yn cryfhau presenoldeb The Rift ar lwyfan byd-eang y celfyddydau trochol, gan agor y drws i gyfleoedd newydd i deithio, arddangos a ffurfio partneriaethau rhyngwladol. Bydd The Rift yn parhau i deithio o gwmpas gwyliau celfyddydau rhyngwladol a byddwn yn cyhoeddi manylion am ddangosiadau eraill dros y misoedd nesaf.

Ar hyn o bryd mae 4Pi Productions yn gweithio ar chweched ffilm ar gyfer y Cryndo Dawns. Mae ein cynhyrchiad newydd yn fenter ar y cyd â Northern Ballet a Chanolfan Schwarzman Prifysgol Rhydychen. Bydd yn troi The Nutcracker yn brofiad trochol, gyda thrac sain gan Gerddorfa Gyngerdd y BBC. Bwriedir ei ddangos am y tro cyntaf ym mis Rhagfyr 2026.

Mae Labordy CULTVR (Caerdydd) a’r Society for Arts and Technology (SAT) (Montreal) yn falch i gyhoeddi arwyddo Memorandwm Cyd-ddealltwriaeth i ffurfioli partneriaeth ryngwladol newydd sy’n ymroi i hybu cyfnewid diwylliannol, arloesedd a datblygu celfyddydau trochol a gweithiau cryndo amgylchynol (fulldome).

Bydd y fenter gydweithio strategol yma’n dod â dau sefydliad blaenllaw sydd wedi ymroi i wthio ffiniau creadigrwydd trochol at ei gilydd. Drwy gryfhau’r cysylltiadau diwylliannol rhwng Cymru a Québec, mae’r bartneriaeth newydd yma’n sefydlu fframwaith ar gyfer cydweithio tymor hir gyda ffocws ar gyd-greu, datblygu proffesiynol a rhannu gweithiau trochol yn fyd-eang.

Mae’r Society for Arts and Technology (SAT), a sefydlwyd yn Montreal yn 1996, wedi bod yn un o’r sefydliadau mwyaf blaenllaw ym maes celfyddydau trochol a diwylliant digidol ers degawdau. Yn 2011, sefydlodd SAT ganolfan eiconig Satosphère, un o’r theatrau modwlar trochol cyntaf yn y byd – yn benodol ar gyfer hybu creadigrwydd artistig trochol a gwireddu gweledigaethau creadigol yn y maes. Mae wedi tyfu’n ganolfan ddylanwadol ar gyfer arbrofi, cynhyrchu ac arddangos cyfryngau trochol a gweithiau cryndo amgylchynol.

Mae Labordy CULTVR, a sefydlwyd yng Nghaerdydd yn 2019, yn un o’r canolfannau cyntaf yn Ewrop i gael ei sefydlu’n unswydd i greu, archwilio a chyflwyno celfyddydau Realiti Ymestynnol (XR). Dyma’r ganolfan gelfyddydau trochol gyntaf o’i math yn y DU. Mae Labordy CULTVR yn cefnogi creadigrwydd trochol drwy weithiau cryndo amgylchynol, perfformiadau Realiti Ymestynnol, celfyddydau digidol a mentrau cydweithio trawsddisgyblaeth, gyda ffocws cryf ar addysg a chyfnewid rhyngwladol.

Mae’r cytundeb hwn yn adlewyrchu ein cred gyffredin fod celfyddydau trochol yn ffynnu drwy gydweithio a chyfnewid. Wrth bontio Québec a Chymru, mae SAT a Labordy CULTVR yn creu fframwaith fyw ar gyfer cyd-greu, arbrofi a dosbarthu a rhannu gweithiau trochol yn fyd-eang. Yn ogystal, rydyn ni’n edrych i gefnogi’r genhedlaeth nesaf o artistiaid sy’n siapio dyfodol arfer celfyddydau trochol a chryndo amgylchynol.”   – Jenny Thibault, Cyfarwyddwr SAT Montreal

Dan amodau’r Memorandwm Cyd-ddealltwriaeth newydd hwn, bydd Labordy CULTVR a SAT yn cydweithio ar amrywiaeth o fentrau i gefnogi artistiaid, gweithwyr technoleg ac ymarferwyr creadigol. Bydd y rhain yn cynnwys rhaglenni creu ar y cyd, preswyliadau i artistiaid, gweithdai hyfforddi a gweithgareddau cyfnewid gwybodaeth i rannu arfer gorau ar gyfer technoleg drochol, adrodd straeon ac ymgysylltu â chynulleidfaoedd.

“Mae’r cytundeb yma’n adlewyrchu ein gweledigaeth gyffredin ar gyfer dyfodol celfyddydau trochol” meddai Janire Najera, Cyfarwyddwr CULTVR. “Drwy gyfuno ein harbenigedd a’n rhwydweithiau, ein nod yw creu cyfleoedd ystyrlon i artistiaid a chrewyr a chyfrannu i esblygiad rhyngwladol arfer a gwaith trochol a Realiti Ymestynnol.”

Mae prif amcanion y bartneriaeth yn cynnwys meithrin cydweithio trawsddiwylliannol, hybu arloesedd ym maes creadigrwydd trochol, cefnogi datblygiad sgiliau a chynyddu mynediad i weithiau trochol drwy berfformiadau, sioeau arddangos, gwyliau a phlatfformau ar-lein yng Nghymru, Québec ac yn rhyngwladol. Mae’r Memorandwm Cyd-ddealltwriaeth hefyd yn agor y drws ar gyfer ceisiadau ariannu ar y cyd i gyrff cenedlaethol a rhyngwladol, gan helpu i gynnal ac ehangu prosiectau cydweithio.

Bydd y Memorandwm Cyd-ddealltwriaeth yn cael ei ffurfioli yn Montreal ar 27 Mawrth 2026. Drwy’r cytundeb hwn, mae Labordy CULTVR a SAT Montreal yn ailgadarnhau eu hymrwymiad i feithrin ecosystemau diwylliannol cynhwysol sy’n edrych tua’r dyfodol a grymuso crewyr ac ehangu cyrrhaeddiad celfyddydau trochol yn fyd-eang

Lluniau gan Camille Gladu-Drouin and Alexandra Kukuc.

Mae CULTVR yn falch o gyhoeddi ein bod yn cynnal rhaglen Labordai Trochol / Labos Immersifs yng Nghaerdydd eleni – pum diwrnod o gydweithio a chyd-greu rhyngwladol sy’n canolbwyntio ar ymarfer a gweithiau celf clyweledol trochol. Bydd y rhaglen yn dod i uchafbwynt gyda chyflwyniad cyhoeddus ar ddydd Gwener 20 Chwefror 2026. Bydd hwn yn gyfle prin i gynulleidfaoedd weld gwaith cryndo amgylchynol newydd ar ganol ei ddatblygiad yn ogystal â chael blas o brofiadau’r artistiaid o Gymru a Quebec.

Cafodd y fenter ei datblygu’n wreiddiol gan AADN – Arts et Cultures Numériques (Lyon, Ffrainc) fel rhaglen hybrid yn cyfuno elfennau o breswyliad artistig, hacathon creadigol a labordy hyfforddi gwib. Nod y rhaglen yw hybu arbrofi, cyfnewid gwybodaeth a chydweithio rhwng artistiaid sy’n gweithio ar draws amrywiaeth o ddisgyblaethau – o gelfyddydau gweledol, cerddoriaeth, a chynllunio sain i gyfryngau rhyngweithiol.

Cafodd rhaglen 2025 ei chynnal gan Society for Arts and Technology (SAT) yn Montréal, gan ddod ag artistiaid a phartneriaid o Ffrainc, Canada, Taiwan, Brasil a Chymru at ei gilydd. Eleni, mae’r rhaglen yn dychwelyd i Labordy CULTVR yng Nghaerdydd.

Bydd grŵp dethol o artistiaid rhyngwladol yn cydweithio’n ddwys am bum diwrnod i gyd-greu darn newydd o waith clyweledol trochol gwreiddiol ar gyfer amgylcheddau cryndo amgylchynol. Bydd y cyfranogwyr yn archwilio methodoleg greadigol, rhannu arbenigedd technegol ac artistig, mynychu dosbarthiadau meistr a chael eu mentora gan arbenigwyr mewn celfyddydau trochol – gan gynnwys ymweliad â stiwdios BBC Cymru. Ar ôl cyfres o sesiynau taflu syniadau ar y cyd i gychwyn, bydd yr artistiaid yn rhannu’n dimoedd bach i ddatblygu prototeipiau o naratifau a phrofiadau trochol newydd yn Labordy CULTVR.

Bydd y rhaglen yn dod i uchafbwynt gyda sioe arddangos gyhoeddus, a gwahoddiad i gynulleidfaoedd ymuno â ni i weld ffrwyth llafur y broses o ddatblygu gweithiau a chyflwyniadau trochol yn ogystal â rhannu profiadau’r artistiaid drwy gyflwyniadau a sgyrsiau.

Mae rhaglen Labordai Trochol 2026 yn fenter ar y cyd rhwng Society for Arts & Technology yn Quebec a CULTVR yng Nghaerdydd. Yr artistiaid sy’n cymryd rhan eleni yw: Benedicte a Milo Reinhardt (Quebec), a Teddy Hunter, Mark Eaglen, Nick Feldman, Natalie Roe, Nic Finch, Jasper Golding ac Adam Martin (Cymru).

CYFLWYNIAD CYHOEDDUS

Labordai Trochol 2026 – Sioe Arddangos Gwaith ar y Gweill

Dydd Gwener 20 Chwefror 2026
18:30 – 20:30
📍 CULTVR, Caerdydd, Cymru (DU)

Amserlen
17:30 – Drysau’n agor
18:30 – Croeso a Chyflwyniadau (SAT, CULTVR, partneriaid)
19:00 – Cyflwyno’r prosiectau, cyflwyniadau gan yr artistiaid a sesiwn Holi ac Ateb                                            20:30 – Sesiwn rhwydweithio i gloi

🎟 Mynediad am ddim drwy RSVP – nifer cyfyngedig

CULTVR yn lansio system ‘Soundscape’ d&b audiotechnik cyntaf Cymru, gan agor y drws i fwy o bosibiliadau ar gyfer perfformiadau trochol

Mae CULTVR, canolfan gelfyddydau trochol a cherddoriaeth byw fwyaf blaengar y DU, wedi gosod system sain d&b Soundscape yn ein canolfan yng Nghaerdydd. Dyma’r unig system o’i math yng Nghymru, ac mae’n agor y drws ar gyfnod newydd o bosibiliadau creadigol ar gyfer sain gofodol a chreu profiadau 360º arloesol yn y brifddinas, diolch i gefnogaeth gan Cymru Greadigol.

Ers agor ei drysau yn 2019 fel canolfan gelfyddydau trochol gyntaf y DU, mae CULTVR wedi gosod Caerdydd wrth galon byd y celfyddydau trochol, a’i gwneud yn gyrchfan ar gyfer cynhyrchiadau sy’n cyfuno Realiti Ymestynnol a pherfformiadau byw. Mae Labordy CULTVR yn fenter annibynnol, sy’n dal i dorri tir newydd wrth ddefnyddio technoleg i ail-ddiffinio profiad cynulleidfaoedd o sain ac elfennau gweledol.

Mae system y d&b Soundscape wedi ennill bri rhyngwladol a chael dylanwad chwyldroadol ar sain byw. Mae wedi cael ei defnyddio gan artistiaid chwedlonol fel Kraftwerk, Björk, a Nitin Sawhney. Mae cynllunwyr sain theatr a chyfansoddwyr nodedig ledled y byd wedi cydnabod dylanwad creadigol unigryw’r system. Mae’n galluogi crëwyr ac artistiaid i greu profiadau sain gyda manylder trachywir a rhyddid creadigol na welwyd ei debyg o’r blaen. Mae’n system hynod sy’n gosod pob elfen o’r sain mewn gofod tri dimensiwn i greu profiad amgylchynol a thrawsnewidiol.

“Yma yn CULTVR, rydyn ni’n edrych am ffyrdd o wthio ffiniau drwy’r amser – o ran y math o le y gall canolfan greadigol fod yn y dyfodol.” meddai Matt Wright, Cyfarwyddwr Artistig CULTVR. “Gyda system Soundscape d&b, bydd cyfle i ymwelwyr gamu i mewn i galon y sain, a phrofi cerddoriaeth fel rhywbeth sydd nid yn unig yn cael ei glywed, ond rhywbeth dych chi’n ei deimlo a dod yn rhan ohono. Mae’n newid cwrs perfformio byw a phrofiadau sonig trochol yma yng Nghymru.”

Cafodd y system ei gosod yn CULTVR gan Southby Productions, arbenigwyr yn nhechnoleg y d&b Soundscape; mae’r system yn cyfuno technoleg gymysgu gwrthyrych-gyfeiriadol gyda dulliau prosesu acwstig soffistigedig. Technoleg y DS100 Signal Engine yw curiad calon y system, sy’n galluogi gosod a symud gwrthrychau sain gyda manylder trachywir yn ogystal â chreu, addasu a newid yr amgylchedd acwstig. Mae’n creu profiad sain sinematig sy’n eich amgylchynu’n llwyr, a thrawsffurfio cerddoriaeth yn brofiad trochol.

Mae gosod y system newydd hon yn garreg filltir o bwys yng nghenhadaeth barhaus CULTVR i gyfuno technoleg flaengar a chelfyddydau trochol. Defnyddiwyd y system newydd am y tro cyntaf ym mis Hydref eleni mewn cyfres o berfformiadau byw gan Ishamel Ensemble, Monocolor a Beardyman – pob un yn gwthio ffiniau cerddoriaeth, celf a thechnoleg. Bydd y system hefyd yn rhan ganolog o gyngherddau, gosodweithiau a sioeau arbrofol a gyflwynir yn CULTVR yn y dyfodol agos (fel sioe profiad trochol ‘Pink Floyd’s The Dark Side of the Moon’) gan gynnig profiadau trochol unigryw na chafwyd eu tebyg o’r blaen gan gynulleidfaoedd yng Nghymru

Gyda’r datblygiad yma, mae CULTVR nawr yn ymuno â rhwydwaith fyd-eang o ganolfannau sydd ar flaen y gad o ran y math yma o dechnoleg sain flaengar. Mae’r gymuned ryngwladol honno’n cynnwys rhai o fannau perfformio mwyaf arloesol a blaengar y byd, lle mae artistiaid, peirianwyr a chynulleidfaoedd yn dod at ei gilydd i archwilio dimensiynau newydd o sain a dulliau o rannu straeon. Drwy ddod yn rhan o rwydwaith d&b Soundscape, mae canolfan CULTVR yn cryfhau’i safle yn rheng flaen arloesi gyda chyfryngau trochol yn y DU a thu hwnt, gan gysylltu talent lleol ag ecosystem fyd-eang o arbrofi creadigol a rhagoriaeth dechnegol.

Mae 4Pi productions yn chwilio am unigolion brwdfrydig ar gyfer dau leoliad gwaith â chyflog. Bydd yr ymgeiswyr llwyddiannus yn gweithio fel Cynorthwywyr Cynhyrchu yn Labordy CULTVR, canolfan draws-ddisgyblaeth drochol gyntaf y DU.

Mae’r lleoliad gwaith yma’n gyfle delfrydol i unrhyw un sy’n awyddus i gael blas ar wahanol agweddau o yrfa yn y diwydiannau creadigol a digidol – yn enwedig ym meysydd cynhyrchu digwyddiadau a chyfryngau trochol. Bydd yr ymgeiswyr llwyddiannus yn cael cefnogaeth tîm profiadol 4Pi Productions a phrofiad o amrywiaeth eang o brosesau artistig a thechnegol.

Prif Gyfrifoldebau

• Paratoi a Gosod Digwyddiadau
  Helpu gyda’r gwaith o baratoi a gosod lleoliadau lle cynhelir digwyddiadau, a thynnu’r cyfan i lawr ar ôl gorffen – yn cynnwys goleuo, sain, seddau, arwyddion, sicrhau nodweddion hygyrchedd. Yn ogystal – sicrhau bod y ganolfan yn ddiogel, glân ac yn barod ar gyfer cynulleidfaoedd.
• Cynorthwyo’r Gynulleidfa a Chyfrifoldebau Blaen Tŷ
  Croesawu ymwelwyr a gwesteion, darparu gwybodaeth am y ganolfan a digwyddiadau a helpu i sicrhau llif esmwyth perfformiadau a chysur y gynulleidfa drwy gydol y profiad.
• Cymorth Technegol a Chynhyrchu
  Gweithio’n agos gyda thîm technegol CULTVR i helpu gyda goleuo, sain, taflunio a gosodweithiau cyfryngau trochol. Rhoi cymorth gydag ymarferion, gwiriadau technegol a helpu i ddatrys problemau bach yn ystod digwyddiadau.
• Helpu gyda Dogfennu Creadigol a Chymorth Cyfryngau Cymdeithasol
  Helpu i sicrhau cynnwys ffotograffig a fideo at ddibenion hyrwyddo ac ar gyfer yr archif. Helpu gyda diweddariadau amser real ar ein cyfryngau cymdeithasol a gwahanol fathau o gynnwys gweinyddol – gan ddilyn canllawiau brandio.

Sgiliau a Phrofiad Angenrheidiol

• Diddordeb yn, neu ddealltwriaeth elfennol o’r broses o gynhyrchu digwyddiadau, cymorth technegol, cyfryngau trochol a/neu ymgysylltu â chynulleidfa.
• Profiad blaenorol (cyflogedig neu wirfoddol) o ddigwyddiadau, cynhyrchu, rolau technegol, neu sgiliau perthnasol neu drosglwyddadwy eraill.
• Sgiliau trefnu cryf a’r gallu i weithio’n annibynnol a gallu cyflawni gwaith o fewn terfyn amser.
• Agwedd gadarnhaol a rhagweithiol, parodrwydd i ddysgu a’r gallu i weithio’n effeithiol fel rhan o dîm.

Dyddiau ac Oriau Gwaith

Mae hon yn rôl ran-amser – sy’n cynnwys 200 o oriau dros gyfnod o 10 wythnos. Trefniant hyblyg, gan gynnwys penwythnosau a gwyliau banc.

Bydd gofyn i chi fod ar gael (rhwng 10am a 5pm) ar 5, 6 a 12 Gorffennaf, a 2, 3 Awst i gymryd rhan mewn sesiynau hyfforddiant clyweledol.

Dyddiad Cychwyn

Yr wythnos sy’n cychwyn ar 30 Mehefin 2025, efallai y bydd gofyn i chi gychwyn yn gynharach – yn ddibynnol ar amserlennu.

Sut i Wneud Cais

Cwblhewch y Ffurflen Google yma gan amlinellu pam fod diddordeb gyda chi yn y rôl, eich argaeledd, a’ch profiad a sgiliau yn erbyn y meini prawf uchod.

https://forms.gle/agFeK93BvpeWFvCr8

Gallwch gyflwyno’ch cais yn Gymraeg neu Saesneg.

I unigolion sy’n F/fyddar, ag amhariad ar eich clyw, anabl, niwrowahanol neu ag amhariad ar eich golwg, mae cefnogaeth bellach ac addasiadau ar gael. Cysylltwch â ni os oes gyda chi unrhyw anghenion arbennig.

Dyddiad Cau i Geisiadau: 

Dydd Mawrth 10 Mehefin 2025 / 17:30

Cyfweliadau: Yr wythnos sy’n cychwyn ar 16 Mehefin – ar Zoom

Labordy CULTVR yn cyhoeddi dychweliad rhaglen Catalydd / Catalyst 360º, y rhaglen gyntaf erioed o breswyliadau Realiti Ymestynnol i’w chynnal yng Nghymru. Ers agor ei ddrysau yn 2019 mae Labordy CULTVR wedi bod yn cefnogi artistiaid digidol a throchol lleol a rhyngwladol i greu a chyflwyno gweithiau celf newydd. Mae rhaglen a rhychwant Catalydd 360º 2025 yn fwy uchelgeisiol nag erioed o’r blaen. Wedi galwad agored a ddenodd dros 300 o geisiadau gan artistiaid, mentrau cydweithio a sefydliadau ledled y byd, bydd Catalydd 360º yn cynnal 3 preswyliad trochol, 6 sioe arddangos Realiti Ymestynnol a digwyddiadau ‘Dim rhwystr i gymryd rhan’.

Gyda chefnogaeth Cyngor Celfyddydau Cymru, mae rhaglen 2025 yn agor pennod newydd yn hanes Catalydd 360º. Byddwn yn parhau i hybu prosiectau celf digidol sy’n creu a chyflwyno straeon trochol ac arloesi technegol drwy breswyliadau ymchwilio, datblygu a chyflwyno sioeau trochol amlddisgyblaeth gyda holl adnoddau Labordy CULTVR. Bydd y preswyliadau hyn yn rhoi’r lle, amser ac adnoddau angenrheidiol i artistiaid lleol, cenedlaethol a rhyngwladol wthio ffiniau celfyddydau trochol.

Yn ogystal â’r preswyliadau, dewiswyd chwech o artistiaid a sefydliadau o Gymru i arddangos gweithiau Realiti Ymestynnol gwreiddiol yn ein cryndo. Bydd y cyflwyniadau Realiti Ymestynnol byw hyn yn gyfle i gynulleidfaoedd brofi prosiectau gwirioneddol flaengar – gan hybu deialog greadigol rhwng artistiaid a chynulleidfaoedd.

Mae cartref Labordy CULTVR yn Grangetown yng Nghaerdydd, ac rydyn ni wedi ymrwymo i sicrhau bod drws celfyddydau trochol ar agor i bawb. Bydd rhaglen Catalydd 360º 2025 yn cynnig gweithdai ymarferol, sgyrsiau gan artistiaid, ymarferiadau agored a theithiau tywys. A byddwn yn cynnal Diwrnod Agored ar 26 Gorffennaf a fydd yn gyfle i holl aelodau ein cymuned amrywiol i ddarganfod mwy a phrofi rhyfeddodau’r celfyddydau trochol ynghyd â chyfle i gwrdd â’r timau creadigol y tu ôl i’r prosiectau.

Dywedodd Matt Wright, Cyfarwyddwr Artistig Labordy CULTVR: “Roedd yr ymateb rhyngwladol i’n galwad agored yn anhygoel. Mae’n amlwg bod galw cynyddol am brosiectau trochol, ac rydyn ni’n falch i ddarparu llwyfan sydd nid yn unig yn hybu arloesi artistig ond sydd hefyd yn sicrhau bod cymunedau lleol yn rhan cwbl ganolog o’r profiad.”

Mae’r prosiectau a ddewiswyd ar gyfer tymor Catalydd 360º 2025 yn cynnwys:

•   23 Mai: Bydd Cwmni Cydweithredol Kitsch & Sync yn meddiannu’r Labordy i gynnal cabaret comedi trochol gyda chymeriadau’n ymddangos mewn mannau anisgwyl, perfformiadau gwib a gemau y gall pawb gymryd rhan ynddynt.
•   21 Mehefin: Prosiect Cydweithredol MWSOG yn dathlu heuldro’r haf gyda siwrne drwy dirwedd, iaith a llên gwerin Cymru – gan blethu cerddoriaeth fyw, barddoniaeth ac elfennau gweledol 360° i gorddi hiraeth.
•   12 Gorffennaf: Bydd Tomos Williams yn perfformio Cwmwl Tystion / Witness – gan gyfuno jazz, cerddoriaeth werin Gymraeg ac elfennau gweledol byw wrth fynd ar drywydd hanes, hunaniaeth a gwydnwch Cymru.
•   26 Gorffennaf: Mark Eaglen yn cyflwyno Quantum Foam – gwaith clyweledol sy’n cael ei lywio gan ymateb a rhyngweithiad y gynulleidfa. Gwaith ymchwil ym maes Theori Cwantwm sydd wedi ysbrydoli’r gwaith; mae’r sioe’n archwilio’r gofod rhwng pethau a syniadau am achos ac effaith ar draws cyflyrau graddfa ac amser cyfnewidiol.
•  1 Awst: Jack Philp – We Live in an Old Chaos of the Sun. Mae’r prosiect cydweithio yma rhwng Jack Philp Dance ac Uncharted Limbo Collective yn plethu coreograffi a thechnoleg ddigidol trochol amser real mewn amgylchedd 360º. Drwy’r profiad creadigol hwn mae’r corff dynol yn gatalydd i ecosystem ddigidol ymatebol sy’n esblygu’n barhaus.
•   8 Awst: Bydd Alma Digital yn ein cyflwyno i Neurocosm, profiad Clyweledol (AV) trochol sy’n defnyddio cynrychiolaeth amser real o ddata a chelf Dealltwriaeth Artiffisial Gynhyrchiol i archwilio camau myfyrio meddylgar.
•   15 Awst: Movement 81 yn cyflwyno profiad clyweledol gan Jason&Becky – yn archwilio gwyddoniaeth a moeseg technoleg ddatblygol gyda chymorth offeryn wedi’i deilwra’n arbennig sy’n defnyddio egwyddorion a dulliau mecaneg cyfrifiaduro cwantwm.
•   29 Awst: Bydd Gwen Siôn yn perfformio Atlantis 2050, prosiect amlddisgyblaeth sy’n troi data amgylcheddol yn gyfuniad o gerddoriaeth iasol ac elfennau gweledol trochol, gan fwrw golau ar effaith codiad lefelau moroedd ac erydu arfordirol.
•   19 Medi: Immersive-me yn cyflwyno Delta, arbrawf byw lle mae gweithgaredd niwral yn siapio’r amgylchedd berfformio mewn amser real – lle mae’r ymenydd yn arweinydd a chynfas.

Mae mwy o wybodaeth am dymor Catalydd 360º 2025 a manylion tocynnau ar gael yma: https://www.cultvr.cymru/.

Dathlu sinema cryndo amgylchynol (fulldome)

Mae CULTVR yn falch i gyhoeddi y byddwn yn cynnal Gwobrau Sinema Cryndo Amgylchynol ‘Best of Earth’ yng Nghaerdydd ym mis Mawrth eleni. Mae’r digwyddiad nodedig yma, a gynhelir bob yn eilflwydd, yn gyfle i gyflwyno a dathlu rhai o’r gweithiau gorau o rai o wyliau ffilm cryndo amgylchynol amlycaf y byd. Mae’n ddathliad rhyngwladol o arloesedd a rhagoriaeth ym maes creu ffilmiau cryndo amgylchynol, ac yn gyfle hefyd i rannu celfyddyd, crefft a’r datblygiadau technolegol sy’n diffinio’r cyfrwng trochol hynod yma.

Mae Gwobrau Sinema Cryndo Amgylchynol Best of Earth yn ffrwyth cydweithio unigryw rhwng rhai o wyliau amlycaf y diwydiant, gan gynnwys FullDome Festival (Jena, Yr Almaen), Dome Fest West (Los Angeles, UDA), Fulldome UK Festival (DU), Dome Under Festival (Melbourne, Awstralia), SAT Fest (Montréal, Canada) a Fulldome Festival Brno (Brno, Tsiecia).

“Mae Gwobrau Best of Earth yn cynrychioli undod digyffelyb y gymuned cryndo amgylchynol,” meddai Ryan Moore, Cyfarwyddwr Gweithredol gŵyl Dome Fest West. “Drwy ddod â gwyliau cryndo amgylchynol mwyaf blaenllaw’r byd at ei gilydd, rydyn ni’n gwneud mwy na dim ond dangos ffilmiau – rydyn ni’n creu llwyfan rhyngwladol sy’n dyrchafu’r cyfrwng cyfan a dathlu’r storïwyr arloesol sy’n gwthio ei ffiniau.”

Yn 2021 a 2023 cafodd y seremoni wobrwyo ei chynnal ym Mhlanetariwm Stiftung yn Berlin. Yn 2025, bydd yn cael ei chynnal yn Labordy CULTVR yng Nghaerdydd – ar 25 Mawrth am 8pm. Yn ogystal, mewn partneriaeth â’r holl wyliau cryndo amgylchynol rhyngwladol sy’n cymryd rhan, bydd y digwyddiad yn cael ei ffrydio’n fyw.

Cyn y seremoni wobrwyo, bydd cyfle i brofi detholiad o’r ffilmiau cryndo amgylchynol trochol a enwebwyd mewn pedwar digwyddiad sgrinio arbennig yn Labordy CULTVR. Bydd hwn yn gyfle unigryw i brofi rhai o’r ffilmiau cryndo amgylchynol gorau a gynhyrchwyd dros y ddwy flynedd ddiwethaf. Mae’r sesiynau sgrinio hyn yn gyfle prin i brofi ffilmiau cryndo amgylchynol sydd ddim fel arfer ar gael yn y Deyrnas Unedig. Bydd cyfle i’r gynulleidfa archwilio eangderau dirgel y ddaear a’r gofod a phrofi gweithiau artistig blaengar – y cyfan drwy gyfrwng sinematig trochol.

CULTVR yw’r unig ganolfan yn y byd sy’n cyflwyno’r sgriniadau arbennig hyn cyn Seremoni Gwobrau Sinema Cryndo Amgylchynol Best of Earth. Mae’r seremoni’n garreg filltir nodedig i’r diwydiant sinema trochol a bydd yn gyfle i ddod â gwneuthurwyr ffilm, gweithwyr proffesiynol yn y diwydiant a phobl sy’n frwdfrydig am gyfryngau trochol at ei gilydd i ddathlu rhagoriaeth ym maes adrodd straeon cryndo amgylchynol.

Manylion y Digwyddiad – Y Seremoni a’r Sgriniadau:

• Ble: Labordy CULTVR
• Dyddiad: 25 Mawrth 2025
• Amser: 8pm
• Mynediad: Am ddim – mwy o wybodaeth YMA
• Sgrinio’r Ffilmiau a enwebwyd: 15 a 22 Mawrth 2025. Mwy o wybodaeth YMA

“Dim ond dechrau pethau yw hyn – dyna sydd i’w weld mewn digwyddiadau fel Gwobrau Best of Earth,” meddai Moore. “Mae sinema cryndo amgylchynol yn esblygu’n gyflym, gan gyfuno technoleg flaengar a chrefft storïol feistrolgar. Mae’r ffilmiau sy’n cael eu hanrhydeddu’n fwy na dim ond ffilmiau – maent yn gipolwg ar ddyfodol adloniant trochol ac yn gosod safonnau newydd ar gyfer yr hyn sy’n bosib yn y cyfrwng hwn.”

Tu hwnt i’r sgriniadau a’r gwobrau, mae Labordy CULTVR yn ymroi i feithrin sgyrsiau am ddyfodol cyfryngau trochol. Bydd cyfle i’r rheini sy’n mynychu’r digwyddiad rwydweithio gyda chyd-ymarferwyr a phobl sy’n frwdfrydig am y maes, cael mewnwelediad i dueddiadau diweddaraf sinema cryndo amgylchynol ac archwilio posibiliadau’r cyfrwng hwn sy’n tyfu a datblygu drwy’r amser.

Ymholiadau’r cyfryngau – cysylltwch â:
info@cultvrlab.com

4Pi Productions yn lansio rhaglen ‘Datgloi Realiti Ymestynnol’ i rymuso arloeswyr y dyfodol ym maes technoleg drochol

Pontio rhwng y byd academaidd a diwydiant i feithrin arweinwyr yfory ym maes Realiti Ymestynnol (XR) a phrofiadau diwylliannol trochol

Caerdydd, Cymru / 28.11.24. Mae’n bleser gan 4Pi Productions, stiwdio greadigol flaengar ym maes technoleg drochol ac adrodd straeon digidol, gyhoeddi lansio rhaglen ‘Datgloi Realiti Ymestynnol’. Mae hon yn fenter addysgol arloesol ar y cyd â thri o brifysgolion mawr Caerdydd, coleg mwyaf Cymru a sefydliad elusennol cenedlaethol. Nod y bartneriaeth unigryw yma yw cyflwyno potensial creadigol Realiti Ymestynnol (XR) a phrofiadau trochol a rennir i gyfranogwyr y rhaglen. Bydd ‘Datgloi Realiti Ymestynnol’ yn pontio’r bwlch rhwng y byd academaidd a diwydiant, gan gynnig rhaglen gynhwysfawr o weithdai, dosbarthiadau meistr, mentora, cyfleoedd cysgodi ac internaethau – y cyfan wedi’i anelu at gynyddu dealltwriaeth y cyfranogwyr o dechnolegau trochol a phrofiadau trochol a rennir.

Gyda Chefnogaeth Cymru Greadigol drwy’r Gronfa Sgiliau Creadigol, bydd rhaglen ‘Datgloi Realiti Ymestynnol’ yn cael ei chyflawni gan Labordy CULTVR – canolfan arloesol ym maes celfyddydau trochol ac addysg. Ers dros bum mlynedd bellach mae Labordy CULTVR wedi ennill enw am redeg rhaglenni addysgol a diwylliannol effeithiol ym maes Realiti Ymestynnol (XR). Mae Labordy CULTVR yn cynnig amgylchedd delfrydol i’r holl gyfranogwyr gael profiadau uniongyrchol o’r dechnoleg drochol ddiweddaraf a meithrin sgiliau ymarferol mewn maes sy’n tyfu’n gyflym – sgiliau y gellir eu defnyddio mewn amryw o sectorau. Dros y 10 mis nesaf, bydd 4Pi Productions yn gweithio gyda sefydliadau addysg blaenllaw gan gynnwys Prifysgol De Cymru, Prifysgol Caerdydd, Prifysgol Metropolitan Caerdydd, Coleg Caerdydd a’r Fro ac Ymddiriedolaeth y Tywysog. Drwy’r partneriaethau hyn, mae’r rhaglen yn anelu i rymuso gweithwyr creadigol traws-ddisgyblaeth a rhoi’r sgiliau hanfodol iddyn nhw archwilio technoleg Realiti Ymestynnol a’i ddefnyddio ym meysydd adloniant, digwyddiadau byw, cerddoriaeth, animeiddio, ffilm, Effeithiau Gweledol (VFX) a chynhyrchu rhithwir.

Dywedodd Jack Sargeant, Y Gweinidog Diwylliant, Sgiliau a Phartneriaeth Gymdeithasol:

“Mae ‘Datgloi Realiti Ymestynnol (XR)’ yn fenter arloesol a fydd yn arfogi myfyrwyr â’r sgiliau, cysylltiadau ac arbenigedd sydd angen arnynt i lwyddo yn y diwydiant realiti ymestynnol sy’n tyfu drwy’r amser. Mae gweld y gefnogaeth y bydd ein Cronfa Sgiliau Creadigol yn ei roi i gymaint o bobl ifanc i fentro i fyd Realiti Ymestynnol yn ysbrydoliaeth gan y bydd yn cynnig adnoddau a chysylltiadau hanfodol ar gyfer gyrfa bosib yn y dyfodol. Pob lwc i bawb!”

Mae rhaglen ‘Datgloi Realiti Ymestynnol’ yn neilltuol am ei bod mor hyblyg ac addasadwy. Mae’n cynnig amrywiaeth o fformatau, hyd cyrsiau a dulliau cyflawni i greu amgylchedd ddysgu gynhwysol sy’n agored i fyfyrwyr MA, BA, BTEC, myfyrwyr hyfforddiant galwedigaethol a mwy. Drwy feithrin hyder a llythrennedd mewn technolegau trochol, mae’r rhaglen yn cyfrannu i’r broses o ddemocrateiddio adnoddau ac addysgu a dysgu digidol, gan roi cyfle i gyfranogwyr o bob cefndir ennill sgiliau allweddol ar gyfer arloesi ym maes Realiti Ymestynnol.

“Mae rhaglen ‘Datgloi Realiti Ymestynnol’ yn gyfle anhygoel i gyflwyno dulliau amgen o wneud ffilmiau i fyfyrwyr. Bydd yn gyfle iddynt archwilio byd Realiti Ymestynnol sy’n datblygu’n gyflym, yn ogystal ag ystyried rhagolygon technegol a chreadigol celfyddydau sgrin yn y dyfodol. Mae’r myfyrwyr wedi ymateb yn frwd i ddosbarthiadau meistr sydd wedi eu gwthio i feysydd newydd o ran ymarfer greadigol ac maent wedi manteisio ar yr adnoddau trochol unigryw hyn yng Nghaerdydd.” Joe Sudlow, Arweinydd Cwrs Ffilm BA (Anrh.)

Yn ogystal â’r mentrau addysgol, bydd rhaglen ‘Datgloi Realiti Ymestynnol’ hefyd yn cynnwys pedwar lleoliad gwaith â chyflog yn Labordy CULTVR; sef y ganolfan gelfyddydau trochol gyntaf o’i math yn Ewrop sy’n defnyddio’r adnoddau a’r dechnoleg Realiti Ymestynnol ddiweddaraf a mwyaf blaengar ac yn arbenigo mewn cyflwyno perfformiadau byw a sinema cryndo amgylchynol (fulldome). Am dri mis, bydd y pedwar a ddewisir yn cael profiad uniongyrchol o gynhyrchu digwyddiadau trochol, gan arbrofi â’r caledwedd a meddalwedd diweddaraf.

“Rydyn ni wrth ein bodd i lansio Datgloi Realiti Ymestynnol a chynnig llwybr i ddarpar weithwyr creadigol i mewn i dechnoleg drochol a Realiti Ymestynnol. Drwy weithio’n agos â phrifysgolion a cholegau ac Ymddiriedolaeth y Tywysog, bydd y rhaglen hon yn gyfle nid yn unig i fynd i’r afael â bylchau mewn sgiliau, ond hefyd i gynnig cyfleoedd datblygu gyrfa i fyfyrwyr o ledled Cymru” meddai Matt Wright, Cyfarwyddwr 4Pi Productions. “Rydyn ni wedi ymrwymo’n llwyr i feithrin gweithlu sgilgar a fydd yn barod i arwain yn y maes cyffrous a deinamig yma.”

Gyda degawd o brofiad o gynhyrchu gosodweithiau rhyngweithiol a phrofiadau trochol, mae 4Pi Productions mewn sefyllfa unigryw i fentora’r genhedlaeth nesaf o dalent. Bydd y rheini sy’n cymryd rhan yn rhaglen ‘Datgloi Realiti Ymestynnol’ yn cael cyfle i brofi technolegau Realiti Ymestynnol a meithrin sgiliau creadigol, technegol a chynhyrchu a fydd yn hwb iddynt ar eu llwybrau gyrfa amrywiol mewn sectorau lle gellir defnyddio creadigrwydd a thechnoleg trochol.

Am fwy o wybodaeth am raglen ‘Datgloi Realiti Ymestynnol’ neu i gymryd rhan, cysylltwch â:

Ebost:  hello@4piproductions.com

CAERDYDD [23.09.24] : Mae Labordy CULTVR, y ganolfan gelfyddydau Realiti Ymestynnol (XR) arloesol, yn falch iawn i gyhoeddi fod ein partneriaeth gyda Fulldome UK, gŵyl gelfyddydau trochol fwyaf nodedig Prydain, yn parhau. Rydyn ni wrth ein bodd ein bod cydweithio eto i ddod â FDUK 24 yn ôl i Gaerdydd ym mis Hydref – gan adeiladu ar lwyddiant ymweliad cyntaf yr ŵyl â Chymru y llynedd. Bydd gŵyl eleni yn ddathliad anhygoel o brofiadau trochol arloesol a chyfryngau di-ffrâm o’r radd flaenaf.

Cynhelir FDUK 24 yng Nghaerdydd ddydd Gwener 11 a dydd Sadwrn 12 o Hydref. Byddwn yn rhoi llwyfan i amrywiaeth eang o waith gan artistiaid a chynhyrchwyr cryndo amgylchynol (fulldome) o ledled y byd. Mae’r ŵyl yn gyfle unigryw i fynychwyr brofi ac archwilio holl sbectrwm creadigrwydd y cryndo amgylchynol, dysgu gan arbenigwyr rhyngwladol a chysylltu â chyd ymarferwyr creadigol sy’n rhan o gymuned y celfyddydau trochol. Mae rhaglen yr ŵyl yn cynnwys paneli trafod, gweithdai i ymarferwyr, dangosiadau arbennig o ffilmiau rhestr fer FDUK 24, perfformiadau byw a llawer mwy.

“Ers dros ddegawd, mae FDUK wedi hybu a dathlu artistiaid, gweithwyr proffesiynol creadigol ac ymchwilwyr sy’n gweithio ym maes amgylcheddau cryndo trochol. Rydyn ni wrth ein bodd i ddychwelyd i Gymru i barhau i feithrin cysylltiadau rhwng cymunedau sy’n siapio dyfodol y maes arbennig hwn sy’n esblygu’n gyflym yn y Deyrnas Unedig ac yn rhyngwladol.” Phil Meyer o Fulldome UK

Mae Dewis Swyddogol 2024 yn cynnwys 36 o ffilmiau trochol o gynhyrchwyd mewn 14 o wahanol wledydd sy’n adlewyrchu ymrwymiad yr ŵyl i roi llwyfan i amrywiaeth o wahanol leisiau a safbwyntiau. Eleni bydd yr ŵyl hefyd yn cyflwyno perfformiadau byw gan artistiaid o’r DU – Bertie Sampson, Beardyman, a Teddy Hunter o Gymru. Yn ogystal, bydd FDUK 2024 yn cynnwys cyflwyniadau gan yr artistiaid amlgyfrwng Aude Guivarch a Marie Leblanc Flanagan sydd wedi cael cefnogaeth yn sgil partneriaeth rhwng Labordy CULTVR a Society for Arts and Technology o Montreal fel rhan o fenter Cymru-Cwibec.

Nod rhaglen yr ŵyl yw denu cynulleidfa mor eang â phosibl, gan gynnwys cynrychiolwyr rhyngwladol, artistiaid, gwneuthurwyr ffilm, cerddorion, cynhyrchwyr ac arloeswyr o fyd technoleg i greu amgylchedd deinamig a chynhwysol i bawb sy’n mynychu.

Mae cynnal gŵyl FDUK fel gwireddu breuddwyd i ni yn Labordy CULTVR. Ers ein profiad cyntaf o FDUK yn 2011, rydyn ni wedi ymroi i gynhyrchu ffilmiau cryndo amgylchynol a pherfformiadau Realiti Ymestynnol byw sydd wedi creu argraff yn fyd-eang. Nawr bod gyda ni ein canolfan gelfyddydau ein hunain, ein nod yw agor drws posibiliadau’r platfformau digidol newydd yma i bawb, ac ysbrydoli cyd ymarferwyr a gweithwyr creadigol, yn union fel y cawsom ni ein hysbrydoli dros ddegawd yn ôl.” Janire Najera – Labordy CULTVR

Ddydd Gwener 11 Hydref bydd yr ŵyl yn cynnal sioe arddangos arbennig – wedi’i threfnu ar y cyd â Town Square a Media Cymru. Bydd y digwyddiad yma’n amlygu prosiectau blaengar a gwaith arloesol gan gwmnïau o Gymru, gan roi llwyfan i dalent lleol a chenedlaethol gyflwyno eu gwaith i gynulleidfa ryngwladol.

Trefnir yr ŵyl gan stiwdios cynhyrchu GaiaNova (Llundain), Cynhyrchiadau 4Pi Productions (Caerdydd) a United VJs (Brasil) gyda chefnogaeth NSC Creative (Caerlŷr), I-Dat a Real Ideas (Plymouth). Mae’r ŵyl hefyd yn un o’r partneriaid a sefydlodd The Best of Earth Awards, menter gydweithredol rhwng rhai o wyliau ffilm cryndo amgylchynol amlycaf y byd, gan gynnwys Gŵyl FullDome yn Jena (Yr Almaen), Dome Fest West yn Los Angeles (UDA), Gŵyl Dome Under yn Melbourne (Awstralia), Gŵyl SAT yn Montreal (Canada) a Gŵyl Brno Fulldome (Y Weriniaeth Tsiec).

Dywedodd Jack Sargeant, Y Gweinidog Diwylliant, Sgiliau a Phartneriaeth Gymdeithasol: Mae bob amser yn gyffrous i weld gwaith sy’n torri tir newydd, fel yr hyn y mae Labordy CultVR a FDUK yn ei wneud, yn parhau i ddatblygu yng Nghymru gan roi platfform ffantastig i artistiaid, gweithwyr creadigol ac ymchwilwyr ym maes technoleg trochol. Mae’r rhaglen yn edrych yn wych, a byddwn yn annog unrhyw un sydd â diddordeb i ddod i brofi’r digwyddiad unigryw yma, archwilio ffyrdd newydd o fwynhau cyfryngau trochol, a chael eich ysbrydoli i ymuno’r â’r sector yma sy’n datblygu’n barhaus.”

Mae FDUK 2024 wedi derbyn cyllid a chefnogaeth gan Lywodraeth Cymru drwy Cymru Greadigol.

Am fwy o wybodaeth ewch i www.fulldome.org.uk